Вазъи муҳоҷирати дохилӣ ва экологӣ дар кадом сатҳ аст?

Душанбе, 27.02.2015. (АМИТ «Ховар», Лайло Тоирӣ). -Ба иттилои сардори Раёсати муҳоҷирати дохилӣ ва экологии Вазорати меҳнат муҳоҷират ва шуғли аҳолӣ Нурулло Назаров ҷиҳати иҷрои қарори Ҳукумати  Ҷумҳурии Тоҷикистон  «Дар бораи муҳоҷирати дохилии аҳолӣ аз ноҳияҳои камзамин ва сераҳолии кўҳистон ба водиҳои дорои заминҳои бекорхобидаи ҷумҳурӣ дар солҳои 2013-2015» дар якҷоягӣ бо мақомоти иҷроияи ҳокимияти давлатии шаҳру ноҳияҳои қабулкунанда ва интиқолдиҳандаи муҳоҷирони дохилӣ корҳои омодагӣ ҷиҳати сари вақт таъмин намудан бо қитъаи замини наздиҳавлигӣ ва қарзи имтиёзнок ба муҳоҷирони тибқи нақша кўчонидашаванда ҳамкориро пурзӯр  намуда, бо мусоид гардидани боду ҳаво кўчонидани муҳоҷирон оғоз мегардад.
Ҳамчунин  дар ҳамкорӣ бо мақомоти иҷроияи ҳокимияти давлатии ноҳияи Нуробод ва Муассисаи давлатии Минтақаи зериобшавандаи НБО- Роғун дар байни аҳолие, ки дар марҳилаи дуюми кўчонидан аз минтақаи зериобмонӣ қарор доранд, корҳои омодагӣ ҷиҳати кўчонидани онҳо идома доранд.
Тибқи нақшаи Ҳукумати Ҷумҳурии Тоҷикистон дар соли 2015 бояд 350 хоҷагӣ аз мавзеъҳои хавфнок ба мавзеъҳои бехавф кўчонида шавад. Дар айни замон рўйхати муҳоҷирон таҳия гардида, бо  Кумитаи ҳолатҳои фавқулода ва мудофиаи граждании назди Ҳукумати Ҷумҳурии Тоҷикистон ва Саридораи геологияи Ҷумҳурии Тоҷикистон мувофиқа гардида, он  рўзҳои наздик ба Комиссияи давлатии Ҳукумати Ҷумҳурии Тоҷикистон оид ба ҳолатҳои фавқулода  барои баррасӣ пешниҳод мешавад.