Вохӯрии намояндагони ИҶТ дар Турсунзода

Душанбе, 20.02.2015 (АМИТ “Ховар”, Фарзонаи Давлат).-Имрӯз дар ҷамоати деҳоти Регар ва толори Хонаи фарҳанги маркази шаҳри Турсунзода мулоқоти намояндагони Иттифоқи ҷавонони Тоҷикистон бо хонандагони макотиби миёна, донишҷӯёни коллеҷҳо ва ҷавонони фаъоли шаҳр баргузор гардид. 
Чорабиниро мудири Бахши ҷавонон, варзиш ва сайёҳии шаҳри Турсунзода Рабеҳ Шарипов оғоз намуда,  чанд сухани ифтитоҳӣ вобаста ба мулоқот баён намуд. 
Намояндагони Иттифоқи ҷавонони Тоҷикистон Фаридун Давлатов ва Наврӯз Қурбонов мақсад аз баргузории вохӯриро суҳбати озоду ошкоро бо ҷавонон арзёбӣ карда, роҷеъ ба дастовардҳои замони соҳибистиқлолӣ ва баланд бардоштани маърифати сиёсию ҳуқуқии ҷавонон маърӯза намуданд. 
Дар мулоқот гуфта шуд, ки дар даврони соҳибистиқлолӣ Ҳукумати мамлакат ва роҳбари давлат нисбат ба ҷавонон таваҷҷуҳи махсус зоҳир намуда, пайваста ташаббуси онҳо дастгирӣ ва амалӣ мешаванд. 
Изҳор гардид, ки ҷавонони фаъоли шаҳри Турсунзода аз имкониятҳои фароҳамоварда самаранок истифода намуда, донишу маърифати сиёсӣ ва ҳуқуқии худро баланд бардоранд, зеро ба таъкиди намояндагон танҳо ҷавонони дорои дониши баланд имкони муаррифии кишварро дар сатҳи байналмилалӣ доранд. 
Ёдовар мегардем, ки чунин силсиламулоқоту чорабиниҳо дар давоми ҳафта дар дигар шаҳру навоҳии мамлакат идома меёбанд.