Вуруди дубораи 182 нафар шаҳрванди Тоҷикистон ба ФР

Душанбе, 6.02.2015 (АМИТ «Ховар», Лайло Тоирӣ).-Ба 182 нафар шаҳрвандони ҷумҳурӣ аз тарафи мақомоти Федеролии муҳоҷирати Русия иҷозаи дубора ворид шудан ба ҳудуди ин кишвар дода шуд. 
 Бино ба гуфтаи  корманди шуъбаи муҳоҷирати меҳнатии ХМ Дустмурод Умбаров як самти асосии фаъолияти Хадамоти муҳоҷират қабул ва роҳнамоии муҳоҷирони меҳнатӣ ва аъзои оилаи онҳо мебошад. Аз ин лиҳоз, барои ҳалли ин масъалаи мубрами рўз аз ҷониби Хадамоти Федералии муҳоҷирати Русия ва Вазорати меҳнат, муҳоҷират ва шуғли аҳолии Ҷумҳурии Тоҷикистон оид ба шахсоне, ки воридшавиашон ба қаламрави Русия манъ  шудааст, гурӯҳи экспертӣ таъсис дода шуд.
 Аз ҷониби гурўҳи экспертӣ 140 нафар донишҷўи кишвар, ки дар мактабҳои олии Федератсияи Русия таҳсил менамуданд ва 42 нафар шаҳрванди дорои оила, патент, иҷозати кор, иқомат барои зист, бемор ва амволи хона иҷозаи вуруди дубора гирифта, ҳоло бо кумаки кормандони Хадамоти муҳоҷират шаҳрвандони мазкур дар Федератсияи Русия қарор доранд.
Шаҳрвандоне, ки воридшавиашон ба ин кишвар бо сабабҳои номаълум аз ҷониби мақомоти дахлдори Федератсияи Русия   манъ шудааст, доштани ҳуҷҷатҳои асоснок оид ба наздикони оила, донишҷўён, дорои патент, иҷозати кор, иқомат барои зист (Вид на жительство и РВП) беморон ва амволи хона дошта бошанд, метавонанд ба Хадамоти муҳоҷират дар кўчаи Айнӣ-121 ва ё бо   телефони боварии 225-07-19 муроҷиат намоянд.