Баргузории намоиш ва фурӯши ниҳолҳо дар Хуҷанд

Хуҷанд, 03.03.2015. (АМИТ “Ховар”,  Абдуаҳад Шарифзода).-28 феврал дар назди Театри ба номи Камоли Хуҷандии шаҳри Хуҷанд ярмарка — фурӯши ниҳол ва дигар зироатҳои кишоварзӣ баргузор гашт. Чорабинии мазкур бо ташаббуси мақомоти иҷроияи ҳокимияти давлатии вилоят  бахшида ба фасли баҳор ва оғози мавсими кишту кор доир гашт. 
Дар чорабинии мазкур, ки хоҷагидорону кишоварзони 12 шаҳру навоҳии вилоят ширкат доштанд, зиёда аз 900 ҳазор бех ниҳоли мевадиханда, сояафкану ороишӣ, ток ва гулу гулбуттаҳо, инчунин наздик ба ҳазор тонна тухмиҳои сабзавоту гулҳо пешкаши харидорон гардонида шуданд. Ҳамзамон аз ҷониби олимону мутахассисони соҳа роҷеъ ба парвариши ниҳолҳо ва зироатҳо нуқтаҳои маслиҳатӣ низ ташкил шуданд.