Баррасии ҳамкориҳои Тоҷикистон бо СААД

Душанбе, 13.03.2015 (АМИТ «Ховар», Фарзонаи Давлат).- Имрўз вазири саноат ва технологияҳои нави Ҷумҳурии Тоҷикистон Шавкат Бобозода бо Котиби генералии Созмони Аҳдномаи амнияти  дастаҷамъӣ  Бордюжа Николай Николаевич  мулоқот кард. Зимни мулоқот масъалаҳои ба миён омада дар миқёси  Созмони Аҳдномаи Амнияти  Дастаҷамъӣ ҷиҳати дарёфт ва ҷалби корхонаҳои муштарак, имконияти ҷойгир кардани фармоишҳо  дар ин корхонаҳо, аз нав таҷҳизонидани онҳо бо технологияи муосир ва пурра ба кор даровардани иқтидорҳои истеҳсоли маҳсулоти саноати мудофиавӣ, таъсис додани корхонаҳои муштарак оид ба коркарди нахи ниҳоии пахта мавриди баррасӣ қарор гирифта, ҷонибҳо  ҷиҳати амалисозии онҳо  ҳамкориҳои судмандро дар самтҳои номбурда мувофиқи мақсад шумориданд.
Бино ба иттилои котиботи вазорати мазкур ҷонибҳо аз натиҷаи вохурӣ изҳори қаноатмандӣ намуда, ҳамчунин иброз доштанд, ки густариш додани ҳамкориҳои дуҷониба  ба манфиати ҷонибҳо хоҳад буд.