Баррасии мушкилоти муҳоҷират бо сокинони Шуғнон
Душанбе, 17.03.2015.(АМИТ «Ховар», Лайло Тоирӣ).-Вохўрии навбатии Гурўҳи корӣ, аз ҷумла муовини вазири меҳнат, муҳоҷират ва шуғли аҳолии Ҷумҳурии Тоҷикистон Мирзоев Абдусалом ва муовини раиси Кумита оид ба корҳои дин, танзими анъана ва ҷашну маросимҳои миллии Ҷумҳурии Тоҷикистон Азизулло Мирзозода бо фаъолон, кормандони корхонаву муассисаҳо ва сокинони ноҳия, ки вуруди онҳо ба каламрави Федератсияи Русия манъ шудааст, 12 март дар шаҳраки Ваҳдати ноҳияи Шуғнон бо иштироки зиёда аз 300 нафар баргузор гардид.
Дар он ҳамаи паҳлўҳои сиёсати давлат дар самтҳои иҷтимоиву иқтисодӣ, ташкили ҷойҳои нави корӣ ҷиҳати паст кардани сатҳи камбизоатӣ ва бахусус, мушкилоти муҳоҷирони меҳнатӣ ба аҳли нишаст фаҳмонида шуд.
Муовини раиси Кумита оид ба корҳои дин, танзими анъана ва ҷашну маросимҳои миллии Ҷумҳурии Тоҷикистон Азизулло Мирзозода дар бораи гузаронидани ҷашну маросимҳои каммасраф, тарбияи фарзандон аз тарафи падару модар ва дигар масъалаҳои тарбиявӣ суҳбат намуд.
Ҷамъомадагон бештар бобати манъи вуруди шаҳрвандони Ҷумҳурии Тоҷикистон ба қаламрави Федератсияи Русия ва минбаъд бо кор таъмин намудани онҳо суолҳо доданд.