Бо «Дараи ҷӯй» аз наздик шинос шавед

Душанбе, 16.03.2015. (АМИТ «Ховар», Мавҷуда Анварӣ).-Дар нашриёти «Истеъдод»-и шаҳри Душанбе китоби нави адиби ҷавон Қаноатшо Зоиров бо номи «Дараи ҷӯй» аз чоп баромад. 
Қаноатшо Зоиров бо тахаллуси Акбарӣ шеър менависад. «Дараи ҷӯй» китоби сеюми ӯст. 
Дар  китоб маводе гирд оварда шудаанд, ки марбути як деҳаи хурди кӯҳистон мебошанд. Дараи ҷӯй деҳаи куҳанбунёдест, ки таърихи қадим дорад. Нависанда аҳли деҳа, аҷдоду авлодро номбар карда, манзараҳои онро тасвир намудааст. 
Маълумоти ҷолибе оид ба корномаи иштирокчиёни ҶБВ низ дар ин китоб оварда шудаанд. Ҳикояҳои хурд, ғазалҳо, номаҳои китоб ба хонанда як олам таассуроти муфид мебахшанд ва ӯро бо деҳаи Дараи ҷӯй наздиктар шинос мекунад.