«Дар партави Паём»-маҷмӯаи нави факултети журналистика

   Душанбе, 20.03.2015. (АМИТ “Ховар”, Манижа Баҳромзода).- Факултети журналистикаи Донишгоҳи миллии Тоҷикистон маҷмӯи  мақолаҳои устодону  аспирантон ва донишҷӯёни факултетро таҳти унвони «Дар партави Паём» дар арафаи ҷашни Наврӯз   ба табъ  расонид. Дар маҷмӯаи мазкур мақолаҳое фароҳам оварда шудаанд, ки дар партави Паёми Президенти Ҷумҳурии Тоҷикистон Эмомалӣ Раҳмон ба Маҷлиси Олии Ҷумҳурии Тоҷикистон (23 январи соли 2015)  таълиф гардидаанд.
        Маҷмӯи мақолаҳои «Дар партави паём» аз 96 саҳифа иборат буда, 22 мақоларо дар бар мегирад. Дар маҷмӯаи  мазкур масъалаҳои муҳими Паёми имсолаи Президенти кишвар  ба  Маҷлиси Олии Ҷумҳурии Тоҷикистон дарҷ гаштаанд. «Масоили ҷаҳони ҳассоси  муосир дар Паём» (Ҳайдаров Ф., Қутбиддинов Б.), «Маориф ва тарбия дар партави Паём» (Раҳмонова Ҷ), «Мутолиа-ангезаи фарҳангпазирии ҷавонон» (Муродов М), «Саршори идеяҳои бунёдкорона» (Гулов С), «Раҳнамои имрӯзу фардои ҷомеа» (Мирзоалӣ С), «Дар партави сиёсати созанда» (Усмонова Н), «Муҳимияти арзишҳои  ахлоқӣ миллӣ дар шароити пуртазоди замони муосир» (Раҳимҷонов Х), «Нақшроҳи муҳтарам Эмомалӣ Раҳмон барои соли 2015» (Ризоӣ М)  аз ҷумлаи мақолаҳое мебошанд, ки дар маҷмӯаи мақолаҳои «Дар партави Паём» нашр шудаанд.