Хуҷанд: Озмунҳо ба истиқболи Наврӯзи ҷаҳонӣ
Душанбе,19.03.2015 (АМИТ “Ховар”, Рафоати Абдулҳамид).- Дар факултети забонҳои хориҷии Донишгоҳи давлатии Хуҷанд ба номи академик Бобоҷон Ғафуров бахшида ба иди Наврӯз як зумра озмунҳо байни донишҷӯёни курсҳои якум, дуюм, чорум ва кафедраҳои он бо иштироки устодон ва донишҷӯён баргузор гардид.
Озмунҳо аз рӯйи шартҳои “Хушнависи беҳтарин”, “Иншои беҳтарин”, “Газетаи девории беҳтарин, “Синфхонаи беҳтарин” гузаронида шуданд.
Тавре ки Хадамоти матбуоти раиси вилояти Суғд хабар додааст, қобили зикр аст, ки донишҷӯён дар ороиши синфхонаҳо тамоми маҳорати худро ба харҷ дода, барои фароҳам овардани муҳити наврӯзӣ саъю кӯшиши зиёд намуданд. Чуноне ки ба мушоҳида расид, ҳамаи устодони кафедраҳои факултет барои гузаронидани озмунҳои наврӯзӣ фаъолона иштирок карданд.
Хусусан ҷамъ ва ба маърази тамошо гузоштани маҳсули эҷоди ҳунармандони миллати тоҷик ба ҳамагон писанд омад.
Ҷоиз ба таъкид аст, ки дар арафаи ҷашни Наврӯзи байналмилал се сол инҷониб дар факултети забонҳои хориҷии донишгоҳ чунин озмунҳо гузаронида мешаванд.