«Истиқлол» бар «Хайр» пирӯз шуд

Душанбе, 16.03.2015. (АМИТ “Ховар”, Ситораи Боймурод).- Дар бозии ниҳоии Ҷоми Федератсияи футболи Тоҷикистон, ки дирӯз дар Варзишгоҳи марказии пойтахти кишвар ба поён расид, дастаи «Истиқлол»-и Душанбе дастаи «Хайр»-и шаҳри Ваҳдатро  шикаст дод. 
Тавре ки дар ин бора Кумитаи миллии олимпии кишвар хабар додааст, ба ин тартиб «Истиқлол” барои бори дувум паиҳам Ҷоми ФФТ-ро ба даст овард. Дарвоқеъ, ин дувумин ҷоизаест, ки қаҳрамони секаратаи Тоҷикистон дар мавсими имсола соҳиб шудааст. 
Ёдовар мешавем, ки «Истиқлол” моҳи феврали соли равон дар мусобиқа оид ба футбол барои Ҷоми осоишгоҳи «Баҳористон» дар шаҳри Қайроққуми вилояти Суғд ғолиб шуд. 
Гуфта мешавад, ки маблағи ҷоизаи мусобиқаи имсола 45 ҳазор сомониро ташкил медод. Дастаи ғолиб — «Истиқлол»  —  бо Ҷоми ФФТ, медалҳои тилло ва ҷоизапулӣ ба маблағи 20 ҳазор сомонӣ сарфароз гардид. Ба дастаи «Хайр”, ки ҷойи дуввумро гирифт, медалҳои нуқра ва ҷоизапулӣ ба маблағи 15 ҳазор сомонӣ ва ба дастаи ССКА «Помир”, ки ҷойи севумро соҳиб гашт, медалҳои биринҷӣ, инчунин 10 ҳазор сомонӣ супурда шуд.