Сокинони Хатлон ба масъалаи муҳоҷират таваҷҷуҳ доранд

Душанбе, 24.03.2015.(АМИТ  «Ховар», Лайло Тоирӣ).-Бино ба иттилои сухангӯи Хадамоти муҳоҷирати Вазорати меҳнат, муҳоҷират ва шуғли аҳолии кишвар Абдуллои Қодирӣ, гурўҳи кории кормандони Хадамоти муҳоҷират бо роҳбарии муовини якуми сардори хадамот Муқим Ниёзов дар моҳи март ба шаҳру ноҳияҳои минтақаи Қурғонтеппа сафар намуд.
Гурӯҳи корӣ нахустин мулоқотро аз ноҳияи Ёвон шурўъ намуда, дар маҷмўъ бо 2615 нафар шаҳрванди ноҳияҳои минтақаи Қурғонтеппа вохўрӣ ва сўҳбат гузаронида, ба онҳо зиёда аз 3 ҳазор маводи иттилоотӣ, аз ҷумла: буклетҳо, санадҳои меъёрии ҳуқуқӣ дар самти муҳоҷиратро тақсим намуд.
Қобили зикр аст, ки чунин вохўриҳо ва суҳбатҳо бо шаҳрвандон ба мақсад мувофиқ буда, барои васеъ кардани дониши ҳуқуқии он муҳоҷирони меҳнатие, ки ба хориҷи кишвар азми сафар доранд, айни муддаост.
Сокинони ин шаҳру ноҳия ба вохӯрӣ таваҷҷуҳи зиёд доштанд, ки ин шаҳодати ба иттилооти бештар ниёз доштани онҳост. 
Лозим ба ёддоварист, ки ҳамаи масъалаҳо дар бораи қоидаҳои будубош ва навовариҳо дар қонунгузории муҳоҷиратии Федератсияи Русия, тарзи пур кардани варақаҳои муҳоҷиратӣ дар фурудгоҳҳо, роҳи оҳан ва гузаргоҳҳои сарҳадӣ, супоридани тест (имтиҳон) аз забони русӣ, таърих ва асосҳои қонунгузории ФР, баланд бардоштани сатҳи маърифати ҳуқуқии муҳоҷирони меҳнатӣ ва бо шиносномаҳои хориҷӣ сафар кардани шаҳрвандони Ҷумҳурии Тоҷикистон ба Федератсияи Русия ва гирифтани Патент, Сертификат ва ғайра аз ҷониби гурӯҳи кории Хадамоти муҳоҷират ба мардум фаҳмонида шуд.