Сокинони шаҳраки Сангтӯда бо оби тозаи нӯшокӣ таъмин шуданд

Душанбе, 19.03.2015. (АМИТ «Ховар»,  Кристина  Эрлих).-  18 март  дар  шаҳраки  Сантӯдаи  ноҳияи  Данғара  маросими  ботантанаи  мавриди  истифода  қарор  додани  лӯлаи  об, ки  сокинони  шаҳракро  бо  оби  тозаи  нӯшокӣ таъмин  менамояд, баргузор гардид. 
Дар  ин  чорабинӣ  Сафири  фавқулодда ва  мухтори  Федератсияи  Русия  дар  Тоҷикистон  Игор Лякин — Фролов,  раиси ноҳияи  Данғара  Маҳмадулло  Сайдалиев, директори  генералии Ҷамъияти саҳҳомии  кушодаи  «НБО Сангтӯда — 1» Павел  Лавров,  ҳамчунин   намояндагони  ВАО  ва  сокинони  шаҳраки Сангтӯда  иштирок доштанд. 
Раиси   ноҳияи  Данғара  Маҳмадулло Сайдалиев  меҳмонону  ҳозиронро  бо  фарорасии  Иди  Наврӯз  муборакбод  карда,  ба роҳбарият  ва  ҳайати  Ҷамъияти  саҳҳомии  пӯшидаи  «НБО Сангтӯда — 1»  барои  дастгирии  ҳамаҷониба  ҷиҳати   ташкили  чорабинии  мазкур  арзи  сипос  карда,  зикр  намуд, ки  мавриди  истифода  қарор  додани  лӯлаи  об  воқеаи  назаррас  аст,  зеро  он  ба  фарорасии  фасли  баҳор  ва  ҷашни  Наврӯз рост омадааст.
Сафири  фавқулодда  ва  мухтори  Федератсияи  Русия дар  Тоҷикистон  Игор  Лякин —  Фролов   зимни  суханрониаш  хотирнишон сохт, ки  Ҷамъияти саҳҳомии кушодаи «НБО Сангтӯда — 1» яке аз  лоиҳаҳои  калонтарини Федератсияи  Русия  дар  фазои  ИДМ  ба  шумор  рафта,  мисоли равшани  ҳамкории  судманди Русия ва Тоҷикистон дар  бахши  неруи  барқ  маҳсуб  меёбад.
Ёдовар  мешавем, ки  масофаи  ин  лӯлаи об  1370 метрро  ташкил  медиҳад.