Тавилдара: Муҳокимаи масъалаҳои муҳоҷирати меҳнатӣ

Душанбе, 16.03.2015. (АМИТ «Ховар», Мавҷуда Анварӣ).-Дар ҷамоати деҳоти Тавилдара ҳафтаи гузашта маҷлиси 1-уми вакилони ҷамоати деҳот даъвати 2-юм баргузор гардид, ки дар он 27 нафар вакил иштирок дошт. Баъд аз муҳокимаи масъалаҳои рӯзномаи маҷлис мудири бахши Хадамоти муҳоҷират дар ноҳияи Тавилдара М. Раҳматов ба вакилон доир ба тағйироту иловаҳо дар қонунгузории нави ФР дар самти муҳоҷирати меҳнатӣ, гирифтани патент, супоридани (тест) имтиҳон аз забони русӣ, таърих ва асосҳои қонунгузории Федератсияи Русия маълумоти мукаммал дода, аз онҳо хоҳиш намуд, ки барои ба рӯйхатгирии муҳоҷирони меҳнатӣ ва шахсоне, ки аз қаламрави Федератсияи Русия хориҷ шудаанд бо ёрии раисони ҷамоат ва маҳаллаҳо мусоидат намоянд. 
Муовини аввали раиси ноҳияи Тавилдара Қурбоналӣ Маҳмадов ва дигар вакилон пешниҳоди мудири бахши Хадамотро дастгирӣ намуда, фикру мулоҳизаҳои хешро нисбат ба муҳоҷирони меҳнатӣ баён доштанд.