Ҷавонон бо мақомот ҳамкориро пурзӯр менамоянд

 
Душанбе, 02.04.2015. (АМИТ «Ховар» Некрӯзи Муҳаммадсодиқ).-  Имрӯз бо ибтикори Вазорати корҳои дохилии Тоҷикистон дар ҳамкорӣ бо Кумитаи ҷавонон, варзиш ва сайёҳӣ дар Китобхонаи миллии Ҷумҳурии Тоҷикистон дар мавзӯи «Ҳамкории ҷавонон бо мақомоти корҳои дохилӣ дар мубориза бар зидди ифротгароӣ» семинари илмӣ-амалии ҷумҳуриявӣ оғоз шуд. 
Вазири корҳои дохилӣ Раҳимзода Рамазон таъкид дошт, ки «мақомоти корҳои дохилӣ баҳри пешгирӣ ва баргардонидани шаҳрвандон, бахусус ҷавонон аз давлатҳои ҷангҷӯ тадбирҳои дахлдор андешида, кӯшиш менамоянд, то ин гуна афрод аз роҳи бад баргашта, дар назди падару модар, оилаву фарзандон зиндагии осоиштаро ба роҳ монанд.» 
Дар семинар муовини Сарвазири Ҷумҳурии Тоҷикистон Марҳабо Ҷабборӣ ба масъалаи гаравидани ҷавонон ба ҳизбу ҳаракатҳои иртиҷоӣ дахл намуда, изҳор дошт, ки ин мушкилот ҷомеаи ҷаҳониро ба ташвиш овардаанд. Раиси Кумитаи ҷавонон, варзиш ва сайёҳӣ Аҳтам Абдуллозода дар чорабинӣ дар мавзӯи «Арҷгузории ҷавонон ба фарҳанги миллӣ ҳамчун омили муҳими ваҳдат дар Тоҷикистони соҳибистиқлол» маъруза намуд. Ӯ таъкид дошт, ки «Аз рӯи нишондоди оморӣ ҷавонони то 30-сола қариб 70% аҳолии Тоҷикистонро ташкил медиҳанд. Маълум мегардад, ки вақте мегӯем: «ҷомеа», асосан ҷавононро дар назар дорем ва вақте «мушкилоти ҷавонон» мегӯем, пеш аз ҳама мушкилоти тамоми ҷомеаи Тоҷикистон дар  назар аст». 
Дар ин бора ба АМИТ «Ховар» Наврӯз Қурбонов, мутахассиси пешбари Бахши таҳлилу иттилооти Кумитаи ҷавонон, варзиш ва сайёҳӣ иттилоъ дод.