Беаҳамиятии волидону муаллимон ба китобхонии наврасон

Душанбе, 30.04.2015.(АМИТ Ховар, Рафоати Абдулҳамид).- Ҳафтаи гузашта дар Тоҷикистон Фестивали ҷумҳуриявии китоб баргузор шуд. Ба иттилои Вазорати маорифи Ҷумҳурии Тоҷикистон аҳли қалам, коршиносони соҳаи адабиёт бар ин назаранд, ки майлу рағбати бачаҳо нисбат ба китобхонӣ рӯз ба рӯз кам шуда истодааст. Мегӯянд, ки насли навраси имрӯза аз китоб дида бештар ба интернет, мусиқиҳои сабук ва филмҳои каммазмун майл мекунад. Ҳуриннисо Ализода, муовини директори Китобхонаи миллии Тоҷикистон мегӯяд, ки бачаҳо имрӯз китоб хондан мехоҳанд, аммо он чизеро, ки мехоҳанд, дастрас намекунанд ва ночор ба манбаъҳои дигари дилхушӣ рӯ меоранд. Сабаб ин аст, ки адабиёти ба талаботи рӯз ҷавобгӯ надорем. Мо одат кардаем, ки гуноҳро ҳамеша сари каси дигар бор кунем.Бояд иқрор шавем, ки адабиёти имрӯзаи тоҷик қафо мондааст. Ҷойи пинҳон нест, ки кӯдакони имрӯза завқи баланд доранд, ҷаҳонбинияшон хеле васеъ аст. Бинобар ин, моро зарур аст, ки вобаста ба завқу салиқаи имрӯзаи бачаҳо ва талаботи маънавии онҳо кору эҷод намоем. Насли имрӯза китобро дӯст медорад ва мехонад, чунки дар рӯзҳои баргузории фестивал ҳамаи мо шоҳид будем, ки чӣ гуна хонандагон бо шавқу шӯр дар вохӯриҳо иштирок ва бо эҳсоси баланд аз ашъори шоирони классику муосир шеърҳо қироат мекарданд. Маълум буд, ки китобдӯстдору китобхонанд. -Сабаби аслии ин ҳолатро ман дар беаҳамиятию беназоратии волидон ва хунукназарии мактабу муаллимон мебинам. Асоси таълим аз хона сарчашма мегирад. Вале мактаб ҳам бояд мавқеашро аз даст надиҳад. Аз ин рӯ, мактаби мо низ ҳамеша ба хотири ҷалби хонандагон ба китобу китобхонӣ талош мекунад. Бачаҳои имрӯза китобро дар шакли электронӣ хондан мехоҳанд. Чунки мо дар асри 21, асри илму техника қарор дорем ва фарзандонамон мехоҳанд ҳамқадами замон бошанд. Дар ин ҷода пеш аз ҳама ба фарзандон таваҷҷуҳи бештар мебояд,-афзуд Ҳуриннисо Ализода.