Хадамоти муҳоҷират: дар садамаи Маскав танҳо ду тоҷик ҳалок шудааст

Душанбе, 23.04.2015. (АМИТ “Ховар”, Манижа Баҳромзода).-Хадамоти муҳоҷирати Вазорати меҳнат, муҳоҷират ва шуғли аҳолии Ҷумҳурии Тоҷикистон расман иттилоъ медиҳад, ки 20.04.2015 тақрибан соати 23:30 дақиқаи шаб, дар шоҳроҳи 19 км МКАД-шаҳри Маскав садамаи нақлиётӣ бо бархўрдани чандин мошини хурд ва ду мошини калони боркаш ба вуқуъ пайваст ва боиси ҳалокати одамон гардид. Тибқи баъзе маълумотҳои васоити ахбори омма гўё 4 нафар шаҳрванди тоҷик дар ин фоҷиа ба ҳалокат расидааст. Намояндагӣ баъди санҷида баромадани воқеаи нохуш муайян намуд, ки фақат ду шаҳрванди Тоҷикистон- яке Додов Самад Абдуллоевич, соли таваллудаш 1981, зодаи ноҳияи Ванҷ ва Шоев Ҷумъахон Усмонович, соли таваллудаш 1970, зодаи ноҳияи Файзобод ба ҳалокат расидааст. Абдулло Қодирӣ-сухангӯи Хадамоти муҳоҷират ба АМИТ «Ховар» иттилоъ дод, ки шаҳрвандони марҳум бо мақсади ба расмият даровардани патент дар Маркази бисёрсоҳаи муҳоҷират, шаҳраки Сахарово, шабона барои гирифтани навбат раҳсипор буданд. Ду нафар шаҳрванди дигар аз ҷониби намояндагӣ муайян гардид, ки яке Отаев Акрамҷон, шаҳрванди Қирғизистон ва дигаре Юсупов Нуриддин Сумиевич, шаҳрванди Ӯзбекистон мебошад. Бо мусоидати намояндагӣ ҷасади шаҳрвандон шоми 21.04.2015 тавассути ширкати ҳавопаймои «Тоҷик — эйр» ба ватан равона гардид.