Исфара: сафарбарии ихтиёрӣ ба сафи Артиши миллӣ

Исфара, 03.04.2015. (АМИТ «Ховар», Абдуаҳад  Шарифзода).-     Мутобиқ ба маъракаи даъвати баҳорӣ дирӯз дар шаҳри Исфараи вилояти Суғд  низ чорабинии гусели аввалин даъватшавандагон баргузор гардид. Тавре ки ба АМИТ “Ховар” роҳбари маркази матбуотии мақомоти шаҳри Исфара Иқбол Тешаев иттилоъ дод,  бо ин мақсад дар Кохи фарҳангии маркази шаҳр ҷамъомади бошукӯҳ доир гашт. Дар ин рӯз ба сафи Қувваҳои Мусаллаҳи кишвар 105 ҷавон  ихтиёрӣ барои хизмат сафарбар гардид. 
Дар чорабинии мазкур, ки  намояндагони мақомоти иҷроияи шаҳрӣ, комиссариати ҳарбӣ, собиқадорони ҷанг ва меҳнат, роҳбарони ҷамоатҳо ва маҳаллаҳои ноҳия, волидони наваскарон ширкат доштанд, раиси шаҳри Исфара Зоҳидзода Даврони Абдуқодир изҳор дошт, ки сол аз сол шумораи ҷавонони бошарафе, ки бо хоҳиши худ ба хизмати ҳарбӣ мераванд, тадриҷан зиёд гардида истодааст.  
Иштироккунандагони чорабинӣ ба наваскарон мардонагӣ ва матонатро дар хизматашон орзу намуданд.