Кайҳоннавардӣ дар мавзӯи «Боғи ҳайвонот дар мадор»

Душанбе, 11.04.2015. (АМИТ “Ховар”, Рафоати Абдулҳамид).- Бино ба иттилои сомонаи раиси вилояти Суғд дирӯз дар Планетарияи ба номи А.Хуҷандӣ конфроси илмӣ-амалӣ бахшида ба Рӯзи байналхалқии  авиатсия ва кайҳоннавардӣ дар мавзӯи «Боғи ҳайвонот дар мадор»  бо иштироки  устодону донишҷӯёни факултаи  физикаю техникаи Донишгоҳи давлатии Хуҷанд ба номи  академик Б.Ғафуров, фаъолони  Ташкилоти ҷамъиятии «Созандагони Ватан»-и назди Кумитаи иҷроияи Ҳизби Халқии Демократии Тоҷикистон дар вилояти Суғд ва омӯзгорони мактабҳои таҳсилоти умумӣ  доир гардид.
Иштирокчиёни чорабинӣ маърӯзаи  донишҷӯи курси сеюми  факултаи физика ва техникаи ДДХ Маҳҷуба Зарифоваро  дар мавзӯи «Ба парвози аввалин инсон ба кайҳон 54 сол пур шуд», намоиши тасвирии  ҷонишини директори планетария Самеъ Хошоковро дар мавзӯи «Боғи ҳайвонот дар мадор», баромади  узви вобастаи Академияи хурди илмҳо, хонандаи синфи 10-и  гимназияи № 2-и шаҳри Чкалов Гесубонуи Парвинро дар мавзӯи «Муаммоҳои омӯзиши ҳаёти ғайризаминӣ дар давраи муосир» бо мароқ шунида, ба саволҳои худ ҷавобҳои мушаххас гирифтанд.