Корҳои геологӣ дар кони «Зарнисори шимолӣ» идома доранд

Душанбе, 03.04.2015. (АМИТ «Ховар»,  Кристина  Эрлих).- Тавре  ки  аз  хадамоти  матбуоти «Тоҷиксаргеология» ба  АМИТ «Ховар» хабар  доданд, охири  ҳафтаи  гузашта роҳбарияти Сарраёсати геологияи  Тоҷикистон  ва  ширкати «Хай Чен» — и  Шанхай масъалаи иҷрои корҳои геологӣ  дар  кони  «Зарнисори  шимолӣ» — ро мавриди  муҳокима  қарор  доданд.  Қобили  зикр  аст, ки  охири  моҳи  феврали  соли ҷорӣ Маҷлиси  намояндагони  ҶТ  Созишномаи  инвеститсионии  байни Ҳукумати  Тоҷикистон ва Ҷамъияти масъулияташ  маҳдуди  «Ширкати  саноати  маъдани Тоҷикистону   Чин» оид ба коркарди  пурраи  захираи кони «Зарнисори  шимолӣ» — ро  тасдиқ  намуд. 
Созишнома  тарҳрезӣ ва  сохтмони   корхонаи  коркарди  пурраи  ашёи  хом аз  ҷониби тахсисдиҳандаи  маблағро  дар назар  дорад. Лоиҳаи  мазкур  аз  ҳисоби  маблағҳои  мустақими  Чин  дар  амал  татбиқ мешавад. 
Мӯҳлати татбиқи  лоиҳа  то  охири   соли  2018 пешбинӣ  шудааст. Мувофиқи  лоиҳа  ҳар  сол  дар  кони «Зарнисори  шимолӣ» 2 миллион  тонна маъдан  истихроҷ мегардад. Иқтидори солонаи корхона 20  ҳазор  тонна  қӯрғошим  аст.