Кўлоб: Ҷамъбасти натиҷаҳои рушди иқтисодӣ-иҷтимоии шаҳр

 Кўлоб,11.04.2015. (АМИТ «Ховар», Фарҳоди Мадамин).-Дар шаҳри Кӯлоб ҷамъбасти натиҷаҳои рушди иқтисодӣ-иҷтимоии шаҳру деҳоти Кӯлоб дар семоҳаи соли 2015 баргузор гардид. Муовини раиси шаҳр Рустам Неъматов зимни баррасии фаъолияти соҳаҳои мухталифи хоҷагии халқи шаҳру деҳоти Кӯлоб дар семоҳаи якуми соли 2015  гуфт, ки дар семоҳаи аввал нақшаи андоз баробари 127 % иҷро гардид. Корхонаҳои саноатии шаҳр ба миқдори 32, 2 мил сомонӣ маҳсулот истеҳсол намуданд. Соли ҷорӣ таъсиси 13  корхонаи дигар дар назар аст. Дар ин давра 328 ҷойи нави корӣ таъсис ёфта, нафақапулии 17 ҳазору 462 нафар пурра пардохт шуд. Музди миёнаи меҳнат 705 сомониро ташкил кард, ки нисбат ба ҳамин давраи соли гузашта 43 сомонӣ зиёд аст. Ҳаҷми боркашонӣ 453 ҳазор тоннаро ташкил кардааст. Дар шаҳр ба маблағи 18,9 миллион сомонӣ корҳои сохтмонӣ анҷом дода шуданд. То имрӯз 2011 хоҷагии деҳқонӣ таъсис гардида, нақшаи пешбинии бунёди боғҳои нав иҷро шуд. Истеҳсоли моҳӣ се баробар афзоиш ёфт.