Намоишгоҳи «Дар он ҷанг ҳамдиёрони мо ҳам саҳм доранд»

Душанбе,20.04.2015 (АМИТ «Ховар» Лайло Тоирӣ).-  Имрӯз  дар Осорхони  таъриху кишваршиносии Костовои  вилояти Нижний  Новгороди Русия  маросими  ифтитоҳи  намоишгоҳи  «Дар он ҷанг ҳамдиёрони мо ҳам  саҳм доранд» баргузор  мегардад. Ин  чорабинӣ  бо  дастгирии  раёсати  фарҳанги  маъмурияти  ноҳияи Костово роҳандозӣ  мешавад, ки дар он  собиқадорони  Ҷанги Бузурги  Ватанӣ, донишҷӯён,  намояндагони  иттиҳодияҳои  асосии  миллию  фарҳангии  минтақа,  мақомоти маҳалии  ҳокимият  ва  аҳли  ҷамъият  иштирок менамоянд.
Дар  ҷамъоварии  нигораҳои  намоишгоҳ Созмони    ҷамъиятии минтақавии «Конгресси  халқҳои  эронзабон» якҷоя  бо ҷамоаи  милии  тоҷикони  ноҳияи  Костово,  шӯъбаи  минтақавии  Конгресси  Озарбойҷон,  Маркази  миллию фарҳангии  халқхои  Доғистон  воқеъ  дар   вилояти Нижний  Новгород  иштирок  намуданд.
Тавре, ки  раиси  Созмони ҷамъиятии  минтақавии «Конгресси халқхои  эронзабон»- и Нижний  Новгород Эраҷ  Боев хабар дод,  дар  ҳошияи  таҷлили  70- солагии  Ғалаба  аз  21 то 24  апрели соли 2015  дар осорхона  барои  хонандагони  макотиби  таҳсилоти  умумии  Костово  бо иштироки  собиқадорони Ҷанги  Бузурги Ватанӣ  силсилаи   маърӯзаҳо  ироа мешаванд.