Намоишгоҳи минётурҳои Олим ва Бону Камоловҳо

Душанбе, 14.04.2015. (АМИТ “Ховар”,Марҳабои Азамат ).- Дар ин рӯзҳо сокинони шаҳри Душанбе ва меҳмонони пойтахт аз намоишгоҳи асарҳои рассомони санъати минётурии тоҷик Олим ва Бону Камоловҳо боздид менамоянд.
Ёдовар мешавем, ки намоишгоҳ шоми 10 апрел ифтитоҳ гардида, фаъолияташро то 30 апрел дар меҳмонхонаи “Серена”- и шаҳри Душанбе давом медиҳад.
Шоми рӯзи ҷумъаи гузашта вазири фарҳанги Ҷумҳурии Тоҷикистон Ш. Орзумбекзода навори рамзии сурхро дар вазъияти ботантана қайчӣ кард.
Дар маросими ифтитоҳи намоишгоҳ ходимони ҷамъиятӣ, намояндагони фарҳанг ва илми Тоҷикистон, дипломатҳо, намояндагони созмонҳои байналмилалӣ ва журналистон ширкат доштанд.
Тавре ки ҳамоҳангсози намоишгоҳ рассом Сарвиноз Ҳоҷиева ба АМИТ “Ховар” хабар дод, дар инҷо беш аз 70 асари Олим Камолов ва духтараш Бону ба маърази намоиш гузошта шудааст.
“Яке аз мақсадҳои асосии намоишгоҳ муаррифӣ намудани асарҳои рассомони санъати минётурии тоҷик на фақат ба ҳаводорони санъати кишвар, балки ба меҳмонони хориҷиест, ки минётураро қадр мекунанд. Биноан, мо ин дафъа ҳам тасмим гирифтем, ки намоишгоҳро дар меҳмонхонаи “Серена” доир намоем”, гуфт Сарвиноз Ҳоҷиева.