ПСС ҶТ дар конфронси бахши тиҷорат ва сармоягузорӣ иштирок мекунад

Душанбе,14.04.2015.(АМИТ “Ховар”).- 13 апрел муовини раиси Палатаи савдо ва саноати Тоҷикистон Манзура Рустамова ҳайати мушовирони намояндагии доимии Бонки рушди Осиё дар Тоҷикистонро , ки роҳбарии онро Майкл Дэли ба ӯҳда дорад, ба ҳузур пазируфт. Назар ба хабари ПСС ҶТ, мақсад аз ташрифи ҳайат муҳокимаи масъалаи расонидани ёрии техникӣ барои таҳкими тартиби тиҷорат ва сармоягузорӣ дар Тоҷикистон , ҳамчунин муҳокимаи масоили ташкилӣ барои роҳандозии конфронси байналмилалӣ оид ба тиҷорат ва сармоягузорӣ буд.Конфронс аз 1 то 5 июн дар шаҳри Душанбе баргузор мешавад. Манзура Рустамова ба намояндагони Бонки рушди Осиё дар бораи фаъолияти палатаи савдо, ки мақсад аз он дастгирии рушди равобити иқтисодии хориҷӣ бо соҳибкорони кишварҳои хориҷӣ мебошад, муфассал нақл кард. “Ҷалби сармояҳо ба баланд бардоштани ҳосилнокии меҳнат, истифодаи судманди технологияҳо ва иртиқои рақобатпазирии корхонаҳои саноатӣ таъсири мусбат мерасонад”-, зикр намуд Манзура Рустамова .