Сафари ҳайати ҳукуматӣ бо сарварии Азим Иброҳим ба ноҳияи Файзобод

Душанбе, 03.04.2015. (АМИТ «Ховар»). — Имрӯз тахминан соатҳои 13:10 дақиқа дар деҳаи Яккабеди ҷамоати деҳоти Меҳрободи ноҳияи Файзобод бар асари офати табиӣ — лағзиши як теппа тахмин даҳ нафар сокинони ноҳия, ки барои кашидани хатти оби нӯшокӣ кор мебурданд, зери хок мондаанд.
 
Комиссияи ҳукуматӣ бо дастури Сарвари Давлат Эмомалӣ  Раҳмон таҳти сарварии муовини Сарвазири мамлакат Азим Иброҳирм ҳоло дар ҷойи ҳодиса қарор дошта, баҳри рафъи оқибатҳои ин офати табиӣ чораҳои зарурӣ меандешанд. Дар ҳайати комиссияи мазкур намояндагони тамоми сохторҳои давлатӣ шомил буда, барои ҳарчи зудтар бартараф намудани оқибатҳои ин офат ва расонидани кумак ба зарардидагон чораҷӯӣ мекунанд.
Аз рӯи маълумоти расмӣ то ҳол исми даҳ нафар аз зерихокмондагон ошкор шуда, ҷасади ду нафари онҳо аз зери хок берун бароварда шудааст. Ҷустуҷӯи нафарони дигар ва корҳои бартарафсозии оқибати офати табиӣ идома дорад.