Шаҳрдорӣ ба Рӯзи пойтахт омодагӣ дорад

            Душанбе, 13.04.2015.(АМИТ «Ховар», Марзия Саидзода).- «Ҳамасола дар Душанбе шанбеи сеюми моҳи апрел Рӯзи пойтахт таҷлил мешавад, ки соли равон он ба 18 апрел рост меояд. Дар иртибот ба ин барои дар сатҳи баланд таҷлил намудани Рӯзи пойтахт раиси шаҳри Душанбе Маҳмадсаид Убайдуллоев қарори марбута ба тасвиб расонда, нақшаи чорабиниҳоро тарҳрезӣ намуд. 
            Дар асоси ин қарор муовинони раиси шаҳр, раисони ноҳияҳои пойтахт ва роҳбарони сохторҳои шаҳр муваззаф гардиданд, ки нақшаи чорабиниҳои тарҳрезишударо амалӣ намоянд.
        Тибқи нақшаи тарҳрезишуда 18 апрел аз соати 8:00 то 11:00 дар пойтахт ҳашари умумишаҳрӣ гузаронида шуда,  ҳамзамон дар ин рӯз  дар Душанбе як силсила иншоотҳои нав ба истифода дода мешаванд. Дар ин рӯз дар Боғи устод Рӯдакӣ, боғҳои фарҳангу фароғатии «Дӯстии халқҳо», «Кӯли ҷавонон» ва майдони «800-солагии Маскав», сайругашти оммавии шаҳрвандон, маҳфилҳои шеъру суруд, намоиш ва фурӯши маҳсулоти қаннодӣ ташкил хоҳад шуд. 
          Инчунин бо мақсади тарғиби тарзи ҳаёти солим дар пойтахт 18 апрел ниммарафони VI байналмилалии Душанбе гузаронида мешавад, ки он аз соати 9:00 оғоз меёбад. 
         Ба муносибати таҷлили Рӯзи пойтахт дар Китобхонаи шаҳрии ба номи А. Лоҳутӣ таҳти унвони  «Душанбе — маркази маънавиёт» намоиши китоб ва конфронси илмӣ-адабӣ ташкил шуда, дар як вақт Фестивали мактабҳои мусиқии бачагонаи пойтахт зери унвони «Душанбе-шаҳри ҷавонӣ»  гузаронида мешавад.
        Ҳамзамон баъд аз зӯҳри 18 апрел дар бинои «Душанбе-Плаза»     ниммарафони VI байналмилалии Душанбе ва озмунҳои касбии анъанавии шаҳрдорӣҷамъбаст гардида, ба ғолибон туҳфаҳои  шаҳрдорӣ эҳдо мешаванд.
       Барномаҳои фарҳангӣ бо иштироки устодони санъат ва ситораҳои эстрадаи тоҷик дар Боғи Наврӯзгоҳ (аз соати 17:00) ва Боғи пойтахт (аз соати 18:00) ба чорабиниҳои фарҳангии шаҳрдорӣ ба Рӯзи пойтахт ҳусни  анҷом мебахшанд.