Шиносоии М. Ҷабборӣ бо вазъи муассисаҳои иҷтимоии ноҳияи Қубодиён

Душанбе, 27.04.2015. (АМИТ «Ховар»). — Имрўз таҳти роҳбарии муовини Сарвазири Ҷумҳурии Тоҷикистон Марҳабо Ҷабборӣ гуруҳи корӣ дар ҳайати сардори Раёсати илму маърифати Дастгоҳи иҷроияи Президенти Ҷумҳурии Тоҷикистон Сайфиддин Давлатзода, мудири Шуъбаи дин, танзими анъана ва ҷашну маросимҳои миллии Дастгоҳи иҷроияи Президенти Ҷумҳурии Тоҷикистон Одинашоҳ Вализода, намояндагони мақомоти иҷроияи ҳокимияти давлатии вилояти Хатлон бо мақсади иҷрои дастуру супоришҳои роҳбарияти Ҳукумати Ҷумҳурии Тоҷикистон ҷиҳати аз наздик шинос шудан бо вазъи муассисаҳои иҷтимоӣ ба ноҳияи Қубодиёни вилояти Хатлон сафари корӣ доир намуданд.
Зимни сафар гуруҳи корӣ аз вазъи таълиму тарбия ва истифодаи самараноки либосҳои мактабӣ дар муассисаҳои таҳсилоти миёнаи умумии рақамҳои 1, 3, 11, 19, 23, 31, Гимназияи №1, мактаб – интернати ҷумҳуриявӣ, Коллеҷи омўзгорӣ, Литсейи касбӣ – техникӣ шинос шуда, аз муассисаҳои бахши фарҳангӣ ва иттиҳодияҳои динии ноҳия низ дидан намуданд.
Дар ҷараёни боздид муовини Сарвазири Ҷумҳурии Тоҷикистон Марҳабо Ҷабборӣ ва ҳайати ҳамроҳонаш бо аҳли ҷамоатчигии ҷамоатҳои деҳоти «Тахти сангин», «Заргар», «Носири Хусрав», «И.Ниёзов», «У.Назаров»ва мулоқот карда, бо рафти корҳои саҳроӣ аз наздик шинос гардиданд.
Вобаста ба натиҷаҳои боздид бо иштироки масъулини мақомоти ноҳия машварати корӣ доир гардида, ҷиҳати вусъат бахшидан ба корҳои фаҳмондадиҳӣ оид ба пешгирии истифодаи либосҳои ғайримиллӣ, пурра таъмин намудани хонандагон бо либосҳои мактабии истеҳсоли ватанӣ, бо ташкил кардани чорабиниҳои фарҳангию фароғатӣ ва маърифатӣ пешгирӣ намудани ҷавонон аз шомилшавӣ ба гурўҳҳои тундгаро, самаранок истифода бурдани рўзҳои баҳорӣ барои корҳои саҳроӣ ва дигар масъалаҳои марбута дастуру супоришҳои дахлдор дода шуд.