Таҷҳизоти тиббӣ барои муоинаи қабл аз никоҳи навхонадорон

Душанбе, 9.04.2015. (АМИТ «Ховар», Мавҷуда Анварӣ).-Вазорати тандурустӣ ва ҳифзи иҷтимоии аҳолии Тоҷикистон барои муоинаи тиббии навхонадорон аз Олмону Чин ва Русия таҷҳизоти махсус дастрас намуд. Тавре ки муовини вазири тандурустии Тоҷикистон Наврӯз Ҷаъфаров иттилоъ додааст, дар айни ҳол тамоми паҳлуҳои масъалаи муоинаи пеш аз тӯйии домоду арӯс омӯхта шуда истодааст, чун ин масъала ниҳоят нозук аст, баъди баррасии ҳамаҷониба аз диди ҳуқуқӣ он роҳ андозӣ мешавад.
Ёдрас мекунем, ки дар Паёми охири худ ба Парлумон Президенти мамлакат Эмомалӣ Раҳмон аз таваллуди шумори зиёди кӯдакони маъюб, ки дар оилаҳои хешу таборон ба дунё омадаанд, изҳори нигаронӣ намуда зикр кард, ки дар миёни ҷавонон ҳолати никоҳи хешовандони наздик низ зиёд шуда, боиси таваллуди кӯдакони маъюб гардида истодааст.
«Имрӯз дар қаламрави кишвар қариб 13 ҳазор нафар кӯдаку навраси маъюби то 18 — сола аз ҷониби давлат нигоҳубин мешавад. Бештари ин кӯдакон маъюби модарзод буда, аз никоҳи хешовандӣ, инчунин аз волидайни гирифтори нашъамандӣ ба дунё омадаанд», — иброз дошт Президент.
Вазоратҳои тандурустӣ ва ҳифзи иҷтимоӣ, адлия, кумитаҳои кор бо занон ва оила, оид ба корҳои дин, танзими анъана ва ҷашну маросимҳои миллӣ вазифадор шуданд, ки масъалаи муоинаи ҳатмии пешакии тиббии издивоҷкунандагон ва пешгирии никоҳи байни хешовандони наздикро якҷо бо мардум ва ҷомеаи шаҳрвандӣ ҳаматарафа омӯхта, ба ҳукумат таклиф пешниҳод намоянд.