Татбиқи лоиҳаҳои ҳукумати Ҷопон дар ВМКБ ва Ҷиргатол

Душанбе, 02.04.2015. (АМИТ «Ховар»).-  25  март  сафири  Ҷопон  дар  Тоҷикистон  Такаши  Камада  дар  маросими  анҷоми  татбиқи  лоиҳаи  сохтмони  шуъбаи  ҷарроҳии    беморхонаи  минтақавии  шаҳраки  Лахши  ноҳияи  Ҷиргатол  иштирок  намуд. 
Тавре  ки  аз  сафорати  Ҷопон  дар  Тоҷикистон  ба   АМИТ «Ховар»  хабар доданд, ҳукумати  Ҷопон  дар ҳошияи  барномаи  кӯмаки  бебозгашт барои  табақаҳои  васеи  аҳолӣ  ва  амнияти  гуманитарӣ  лоиҳаи  арзишаш  111 ҳазору  133 доллари  ИМА — ро  дар  амал  татбиқ  намуд. 
26 март  Такаши Камада  дар  маросими  анҷоми  татбиқи  лоиҳаи  такмили  беморхонаи   минтақавии  ҷамоати  Қарокӯли  ноҳияи  Мурғоб  иштирок  намуд. Барои  бунёди  бинои  нави  беморхона ва   насби  таҷҳизоти нави тиббӣ 120  ҳазору  373  доллар  ҷудо  карда шуда буд. Ёдовар  мешавем, ки бинои  пештараи   беморхона  соли  1960 сохта шуда ва  шароити  зарурӣ  надошт.  Дар  ҳошияи  лоиҳа  беморхона  ба  бинои  наве   гузаронида шуд, ки  таҷҳизоти нави тиббӣ  дорад.
29  март  сафири  Ҷопон  дар  Тоҷикистон  дар  маросими  дигари  анҷоми  татбиқи  лоиҳа дар  деҳаи  Сижди  ноҳияи  Шуғнон, ки дар он  ҷо «Лоиҳаи  ҷилавгирии офатҳои  табиӣ  дар  қад — қади  дарёи  Панҷ» дар  амал  татбиқ  шудааст, иштирок дошт. 
Ҳукумати  Ҷопон барои  соҳилбандӣ  дар  деҳаи  Риҷисти  ноҳияи  Роштқалъа  ва  деҳаҳои  Барсем  ва  Шитами   ноҳияи  Шуғнон,  сохтмони пули  пиёдарави  деҳаи Сижди  ноҳияи  Шуғнон  ва  қишлоқи  Андарви  ноҳияи  Роштқалъа 103  ҳазору  867 доллар ҷудо  карда буд. Ғайр  аз  ин канали обёрии деҳаи Биҷури  ноҳияи  Роштқалъа  барқарор  карда шуд.