Таваҷҷуҳи ширкати русиягӣ ба хушкмеваи Суғд

Хуҷанд, 25.04.2015. (АМИТ “Ховар”,Абдуаҳад Шарифзода).-Намояндагии ширкати русиягии “Монетка” ба харидории маҳсулоти кишоварзӣ, махсусан меваи хушки  хоҷагиҳои вилояти Суғд таваҷҷуҳи хосса дорад. Ин нуқтаи назар зимни ташрифи намояндагии ширкати мазкур ва мулоқот бо раиси вилояти Суғд зикр ёфт.  Тавре ки аз маркази иттилоотии раиси вилояти Суғд хабар доданд, раиси вилоят Абдураҳмон Қодирӣ мушовири намояндагии тиҷоратии Федератсияи Русия дар Ҷумҳурии Тоҷикистон Магомед Тоштемиров ва директори тиҷоратии шабакаи тиҷоратии «Монетка» — и Русия Константин Шаповаловро ба ҳузур пазируфт.
Зимни суҳбат Абдураҳмон Қодирӣ оид ба ҷараёни ислоҳоти кишоварзӣ таъкид кард, ки дар вилояти Суғд имкониятҳои фаровон барои коркард ва банду басти меваи хушк ва содироти он ба хориҷа мавҷуд буда, дар ин замина ҳамасола аз ҳудуди вилоят  содироти маҳсулоти кишоварзӣ, махсусан меваи хушк ба хориҷа дар ҳоли афзоиш қарор дорад.
Константин Шаповалов аз қабули гарму самимӣ изҳори хушнудӣ намуда, таъкид кард, ки шабакаи тиҷоратии «Монетка» дар минтақаҳои гуногуни Русия, аз қабили Свердловск, Челябинск, Тюмен, Томск, Перм, Курган ва дар маҷмӯъ, дар 230 шаҳри Русия беш аз 700 мағозаи худро фаъол намудааст. Маҳз чунин фарогирӣ ба ин шабакаи тиҷоратӣ имкон медиҳад, ки хариди маҳсулоти баландсифати хоҷагии қишлоқро аз хориҷа низ ба роҳ монад. Дар ин замина имкониятҳои ҷониби Тоҷикистон хеле хуб арзёбӣ шуд.