ВКД ҶТ: ҷаласа оид ба ҳифзи тартиботи ҷамъиятӣ

 Душанбе, 10.04.2015. (АМИТ «Ховар», Мукаддас Темурзода).-Дирӯз бо ташаббуси вазири корҳои дохилии ҶТ Раҳимзода Рамазон Ҳамро бо иштироки муовини раиси шаҳри Душанбе Н. Хайруллоев, сардорони шуъбаҳои дахлдори Ҳукумати шаҳри Душанбе, раисони ноҳияҳои пойтахт, намояндагон аз Вазорати нақлиёти ҷумҳурӣ, сардорони раёсатҳо ва ҷузъу томҳои мақомоти корҳои дохилӣ ҷаласа баргузор гардид.
Тибқи иттилои ВКД ҶТ, дар ҷаласа масъалаҳои ҳифзи тартиботи ҷамъиятӣ ва низоми нақлиёт дар шаҳри Душанбе мавриди баррасӣ қарор гирифта, зикр гардид, ки дар ин замина ҳамкории сохторҳои шаҳрӣ бо Раёсати ВКД дар шаҳри Душанбе ва ноҳияҳои он вобаста ба таъминоти тартиботи ҷамъиятӣ ва низоми нақлиётӣ ба роҳ монда шудааст.
Дар ҷаласа вазири корҳои дохилӣ ҷиҳати риоя намудани ҳифзи тартиботи ҷамъиятӣ, мубориза бар зидди ҷинояткорӣ, ҳуқуқвайронкуниҳо ва бартараф намудани камбудиҳои ҷойдошта ба масъулин дастуру супоришҳои мушаххас дод.