Барномаҳои нави электронӣ-низоми нави фаъолият

Душанбе, 15.05.2015. (АМИТ «Ховар», Мавҷуда Анварӣ).-Бо ташаббуси ширкати «Орекл Текнолоҷи» дар шаҳри Душанбе машварат доир гардид, ки дар ҷараёни он мутахассисони соҳаҳои гуногун барои баланд бардоштани таҷрибаи худ дар соҳаи технология ва инноватсия ширкат карданд. Тавре ки баён гардид, истифодаи технологияи муосир тақозои давру замон буда, тавассути он корҳои гуногунро метавон осон гардонд. 
Хизматрасонии ширкати номбурда ба самте равона гардидааст, то дар ҷомеа барои фаъолияти соҳаҳои ҳаёт сабукиҳоро пеш орад. Таъкид рафт, ки инчунин барои рушди иқтисодиёт ва тиҷорату пешрафт имконияти нави техникиро бояд амалӣ кард. Ворид шудани навовариҳои техникӣ бо мурури замон ва ба миён омадани талаботи нав ба нави инсоният дида мешавад. Аз ин рӯ, технологияи орекл сол то сол сифатан баланд ва ба талаботи давру замону ниёзи истифодабарандагон ҷавобгӯ гардонида мешавад. Барномаҳои нави электронӣ низоми нави фаъолиятро ба вуҷуд меоранд ва дар рушди тиҷорату савдо миёни ширкатҳо дар саросари олам кори инсонро беҳтар месозанд.