Баррасии ҳамкориҳои сайёҳӣ бо Фаластин

Душанбе 20.05.2015 (АМИТ «Ховар», Фарзонаи Давлат).-Дар доираи мулоқоти худ Аҳтам Абдуллозода, раиси Кумитаи ҷавонон, варзиш ва сайёҳӣ бо Сафири Фавқулода ва Мухтори давлати Фаластин дар Тоҷикистон Муҳаммад Таршаҳанӣ масъалаҳои соҳаи сайёҳӣ ва варзишро бо давлати Фаластин  мавриди баррасӣ қарор додааст. 
Тавре ки дар ин бора Наврӯз Қурбонов, мутахассиси пешбари Бахши таҳлилу иттилооти Кумитаи ҷавонон, варзиш ва сайёҳӣ хабар дод,  вохӯрӣ имрӯз дар Кумитаи ҷавонон, варзиш ва сайёҳӣ доир гардид.
Ҷонибҳо дар мулоқот ҳавасмандии худро барои ҳамкорӣ дар самти туризм ва варзиш баён дошта, изҳор доштанд, ки ин барои рушди соҳаи сайёҳии ҳарду ҷониб мусоидат хоҳад кард. 
Дар мулоқот таъкид шуд, ки туризм соҳаи муҳим буда, шаҳрвандони кишварҳо хоҳиши дидани манзара ва мавзеъҳои туристиро доранд. 
Ба иттилои Аҳтам Абдуллозода дар самти варзиш дар кишвар корҳои зиёд анҷом ёфта, ин соҳа рӯз ба рӯз инкишоф ёфта истодааст. Аз ин рӯ, гуфта шуд, ки барои ҳамкорӣ дар ин самт ягон мушкилии ҷиддӣ мавҷуд набуда, ҷонибҳо барои тавсеа бахшидани муносибот дар ин самт низ имкони хуби ҳамкориро доранд. 
Дар анҷом ҷонибҳо аз мулоқот изҳори қаноатмандӣ намуда, роҳбарияти Кумитаи ҷавонон, варзиш ва сайёҳӣ ба сафир туҳфаи хотиравӣ тақдим намуд.