Хуҷанд: Омодагиҳо ба таҷлили Рӯзи байналмилалии кӯдакон

Душанбе, 27.05.2015. (АМИТ »Ховар», Рафоати Абдулҳамид).- Бино ба иттилои Хадамоти матбуоти раиси вилояти Суғд дар шаҳри Хуҷанд бахшида ба Рӯзи байналмилалии кӯдакон, ки ҳамасола  1- уми  июн таҷлил мегардад, чорабинии пуршукӯҳ доир хоҳад шуд.
Дар ин рӯз Маҷмаи фарҳангию таърихии «Қалъаи Хуҷанд» ба идҷой табдил хоҳад ёфт. Тибқи нақшаи Мақомоти иҷроияи ҳокимияти давлатии вилояти Суғд ва шаҳри Хуҷанд  1- уми  июн дар маҷмаа намоиши маҳсулоти ҳунарҳои халқӣ аз ҷониби кӯдакону наврасон омода гашта, адабиёти бачагона, барномаи консертии ҳунармандони ҷавон баргузор гашта, бо қувваи табиатдӯстони ҷавон «Гӯшаи зинда» -и паррандаҳо, моҳиҳо ва дигар ҳайвонот ташкил мешавад.
Масъулини чорабинӣ ният доранд бо мақсади ташаккули завқи зебоипарастӣ ва ҷалби кӯдакону наврасон ба варзиш озмуни «Расми беҳтарин дар асфалт» ва мусобиқаҳои тенниси рӯи мизӣ, шоҳмоту шашкаро низ доир намоянд.
Дар чорабинӣ барои ҳозирон барномаи консертии истеъдодҳои ҷавон пешкаш хоҳад шуд.