Ифтитоҳи толори дӯстии халқҳо

Душанбе, 07.05.2015. (АМИТ «Ховар»,  Лайло  Тоирӣ).- Ҳафтаи  гузашта  дар Китобхонаи  бачагонаи  ба  номи Аркадий Гайдари   шаҳри  Нижний  Новгороди Федератсияи  Русия толори  дӯстии  халқҳо   дар  вазъияти  ботантана  мавриди истифода  қарор  гирифт. Чорабинии  мазкур  ба  манзури  татбиқи  барномаи  «Гулбарги  дӯстӣ» рӯи  кор омад, ки  мақсад  аз он  таҳкими  ягонагии  байни  миллатҳо ва  тавсеаи муколамаи  байнифарҳангӣ  дар  минтақа  аст. 
Чорабинӣ  бо  дастгирии  бархе  иттиҳодияҳои  миллию   фарҳангии  вилояти  Нижний  Новгород  роҳандозӣ  шуд. 
Дар  маросими  ифтитоҳи толори  дӯстии халқҳо  намояндагони   мақомоти ҳокимияти  давлатӣ  ва  худидораи  маҳаллӣ,  аҳли  илму  адаб  низ  ширкат  доштанд. Дар  толор  китобҳои  муаллифони  кишварҳои  гуногун, асбобҳои  марбут ба  фарҳанги  маънавию  моддии  миллӣ ба  маърази намоиш  гузошта шудаанд.
Толори дӯстии  халқҳо  дар  арафаи  70 — солагии Ғалаба  дар Ҷанги  Бузурги  Ватанӣ  ифтитоҳ  гардид,  ки он   рамзи  хоса  дорад.