Иштироки муовини Сарвазири ҶТ дар маросими ифтитоҳи коргоҳи дӯзандагӣ

 
Душанбе, 19.05.2015. (АМИТ «Ховар»,  Мурод  Сотиев).- Имрӯз муовини  Сарвазири Ҷумҳурии  Тоҷикистон  Марҳабо  Ҷабборӣ  дар  ҳошияи  сафараш  ба вилояти  Хатлон  дар  маросими  ифтитоҳи   коргоҳи  нави  дӯзандагии дорои 15 ҷойи  нави  кории  созмони ҷамъиятии  «Чашма» — и  ноҳияи  Шаҳритус  иштирок  намуд.
Қобили  зикр  аст, ки   барои  коргоҳи  нав  коргарони  лаёқатманд тайёр  карда шудаанд.
«Имрӯз  барои бунёди  корхонаҳои нави  истеҳсолӣ бояд ҳамаи  имконоти  мавҷуда  истифода шаванд, зеро ин яке  аз самтҳои  афзалиятноки фаъолияти  дохилӣ  дар  ҷумҳурӣ ба  шумор  меравад», — гуфт  зимни  суханрониаш  муовини  Сарвазири  Тоҷикистон.
Марҳабо  Ҷабборӣ  ҳамчунин  зикр  намуд, ки Ҳукумати  ҷумҳурӣ   бахши  истеҳсолотро  дастгирӣ  карда,  барои рушди   соҳибкории  хурду  миёна  ба  манзури фароҳам овардани ҷойҳои нави  корӣ маблағҳои бебозгашт  ҷудо  мекунад.
М.Ҷабборӣ  дар  ҷараёни  сафараш ҳамчунин  аз хоҷагии  деҳқонии «Наврӯзҷон» боздид  намуда,  бо   занони  хоҷагии  мазкур  суҳбат  кард.