Муаррифии фарҳанги тоҷик дар Фестивали байналмилалии анъанаҳо

Анталия, 18.05.2015. (АМИТ «Ховар», Муқим Малаев). — Дар Донишгоҳи байналмилалии Анталияи Ҷумҳурии Туркия фестивали байналмилалии муаррифии анъанаҳои миллии кишварҳои дунё баргузор гардид, ки дар он 18 нафар донишҷӯи тоҷик ширкат варзиданд. Дар фестивали мазкур донишҷӯёни тоҷик гӯшаи худро доштанд, ки тавассути он аксҳо, либосҳои миллӣ, асбобҳои мусиқии тоҷикӣ ва таомҳои миллӣ пешкаши тамошобинони фестивал гардиданд. Дар фестивал донишҷӯёни тоҷик санъати баланди мусиқии тоҷикро дар радифи дигар кишварҳо бо сурудани сурудҳо ва дар намоиш гузоштани рақсҳои миллӣ муррифӣ карданд.   
Дар маҷмӯъ дар ин фестивал 500 донишҷӯ аз 83 кишвари ҷаҳон иштирок намуд. Донишҷӯёни тоҷик бо малакаву истеъдоди беҳамтои худ санъату фарҳанги  тоҷикро дар замири намояндагони ин кишварҳо коштанд, ки ин албатта, барои шинохти боз ҳам бештар ва муаррифии номи Тоҷикистон дар арсаи ҷаҳон мусоидат мекунад.