Мулоқоти нуҳуми кишварҳои узви Ёддошт дар бораи ҳусни тафоҳум
Душанбе, 05.05.2015. (АМИТ «Ховар», Муқаддас Темурзода).- 4 май дар шаҳри Ашқобод мулоқоти нуҳуми кишварҳои узви Ёддошт дар бораи ҳусни тафоҳум ҷиҳати ҳамкорӣ дар бахши назорати маводи мухаддир ба кораш шурӯъ намуд, ки дар он намояндагони хадамоти мубориза алайҳи маводи мухаддири кишварҳои Осиёи Марказӣ, Озарбойҷон ва Русия ширкат доранд.
Назар ба иттилои Агентии назорати маводи нашъаовари ҶТ, ба ин чорабинӣ ҳамчунин роҳбарони созмонҳои байналмилалӣ ва сохторҳои мубориза алайҳи маводи мухаддир, намояндагони давлатҳои мушоҳид ва мададгорони Маркази минтақавии иттилоотию танзимотии Осиёи Марказӣ оид ба мубориза бо гардиши ғайриқонунии маводи мухаддир ва моддаҳои фалаҷкунандаи асаб даъват шудаанд.
Аз ҷониби Ҷумҳурии Тоҷикистон дар мулоқот вазири корҳои хориҷии ҶТ С.Аслов, директори Агентии назорати маводи нашъаовари назди Президенти ҶТ Р.Назарзода, муовини вазири адлия Ш.Нодирӣ ва сардухтури Диспансери ҷумҳуриявии наркологии Вазорати тандурустии ҶТ М.Малахов ширкат доранд.
Директори Агентии назорати маводи нашъаовар Р.Назарзода зимни суханрониаш иброз дошт, ки ба вазъи маводи мухаддир дар минтақаи Осиёи Марказӣ кӯшиши гурӯҳҳои нашъаҷаллобон барои васеъ намудани бозори фурӯши маводи мухаддир хос аст.
Зикр шуд, ки барои ташкили низоми судманди мубориза бо ҷинояткории муташаккилона ва гардиши ғайриқонунии маводи мухаддир, таҳкими сарҳадот ва густариши фаъолият барои ҷилавгирии нашъаҷаллобӣ бояд мақомоти зидди маводи мухаддири кишварҳои минтақа бештар якҷоя саъю кӯшиш намоянд.