Нинся дастовардҳои иқтисодияшро ба намоиш мегузорад

Душанбе, 14.05.2015.(АМИТ «Ховар», Марзия Саидзода).- Беш аз 50 ширкати истеҳсолии ноҳияи мухтори Хуэйи музофоти Нинсяи Чин молу маҳсулоти худро дар нахустин намоишгоҳи ин музофот, ки аз 18 то 21 майи соли равон дар «Кохи Борбад»-и Душанбе баргузор мегардад, ба намоиш ва фурӯш мегузорад. 
       Назар ба иттиллои Мукаммал Одинаева -сухангӯи Палатаи савдо  ва саноати Тоҷикистон,  нахустин намоишгоҳ дар доираи таҳими ҳамкориҳои иқтисодию тиҷоратии Тоҷикистону Чин созмон дода шуда, ҳадафаш густариши ҳамкориҳои иқтисодию тиҷоратӣ байни ду кишвари ҳамҷавор-Тоҷикистон ва Чин ва ҷалби сармоягузорони ин кишвар ба Тоҷикистон арзёбӣ мегардад.
     Интизор меравад, ки дар намоишгоҳ ширкатҳои чиноӣ молу маҳсулотҳоро дар бахшҳои  саноатӣ, энергетика, ҳавопаймоӣ, мошинасозӣ, механикӣ, автомобилӣ, бофандагӣ, дӯзандагӣ, коркарди пӯст, шишабарорӣ, сохтмонӣ, маводи хӯрокию нӯшокӣ, маҳсулоти «Ҳалол», кишоварзӣ, технологияҳои баланд, мошинолот, либосӣ, молҳои  маишӣ ва рӯзгор ба намоиш ва фурӯш  гузоранд.