Татбиқи марҳилаи дуюми фаъолият дар ҶДММ «Мурғи ҳилол»

Файзобод, 14.05.2015. (АМИТ Ховар, Субҳониддини Маҳмуд).-ҶДММ «Мурғи ҳилол»-и ноҳияи Файзобод 560 нафар сокини ноҳияро бо ҷойи кори доимӣ таъмин кардааст, ки маоши миёнаи онҳо аз 757 сомонӣ оғоз мегардад. Назар ба қавли роҳбари ҷамъият Зафар Ҳакимов мувофиқи нақша корхона фаъолияташро дар ду марҳила идома медиҳад. Марҳилаи аввал истеҳсоли тухми мурғ ва марҳилаи дуввум истеҳсоли гӯшти мурғро фаро мегирад. Дар айни замон марҳилаи аввал иҷро гардидааст ва роҳбарони корхона кӯшиш доранд, ки марҳилаи дуввумро барои истеҳсоли гӯшти мурғ ба роҳ монанд. Дар ин самт аз ҷониби корхона барои ҷалби сармояи хориҷӣ лоиҳаҳо омода шудаанд ва дар арафаи анҷомёбӣ мебошанд. Ногуфта намонад, ки барои амалӣ намудани марҳилаи дуввуми лоиҳа бо Бонки рушди АвруОсиё ҳамкории наздик ба роҳ монда шудааст. Дар сурати аз ҷониби Бонки рушди АвруОсиё дастгирӣ ёфтан, дар ҶДММ «Мурғи ҳилол» кушторгох ва сардхонаҳо ташкил шуда, пурра фаъолият мекунанд. Ба гуфтаи Зафар Ҳакимов дар сурати татбиқи ин лоиҳа зиёда аз 300 ҷойи нави корӣ таъсис меёбад ва ба нақша гирифта шудааст, ки дар як сол истеҳсоли тухм ба 170 миллион дона ва истеҳсоли гӯшти мурғ ба 12 ҳазор тонна дар як сол расонида шавад.