Вазир иштироккунандагони ҶБВ — собиқадорони мақомоти корҳои дохилиро аёдат кард

Душанбе, 06.05.2015. (АМИТ «Ховар»,  Муқаддас  Темурзода).- Вазири  корҳои дохилӣ  Раҳимзода  Рамазон  Ҳамро дар  арафаи  70 —  солагии Ғалаба  дар Ҷанги  Бузурги  Ватанӣ собиқадорони  мақомоти   корҳои  дохилӣ  —  иштироккунандагони  ҷангро аёдат кард.
Назар  ба  хабари  ВКД ҶТ,  вазир бо  сифати  таъмири хонаҳои  бархе  собиқадорон,  аз ҷумла  манзили  Ф.М. Гришин  дар   ноҳияи  Фирдавсӣ,  Н.П.Голиков  ва П.П. Гордян  дар  ноҳияи  Сино,  Маҳмадулло  Сафаров  дар  ноҳияи  Исмоили  Сомонии  шаҳри  Душанбе  шинос  шуд.
Рамазон  Раҳимзода ба  собиқадорони  ҶБВ  мукофотҳои  пулӣ  дод. Ба  собиқадорон  ҳамчунин  маводи  ғизоӣ  аз  қабили  орд, равған,  биринҷ,  шакар,  макарон, сабзавоту  мева, техникаи  рӯзгор  аз ҷумла телевизиор  тақдим  шуд. Вазир  зикр  намуд, ки  ба  собиқадорони  ҷангу  меҳнат  минбаъд  ҳам ёрӣ  расонида  хоҳад  шуд.
Собиқадорон  ба  вазир  барои ғамхорию  меҳрубониаш изҳори  миннатдорӣ  карда,  ба  мавсуф  дар  кори масъулиятнокаш  муваффақиятҳо  орзу  карданд.