Ҷаласаи дуюми Комиссияи байниҳукуматии Тоҷикистону Молдова оид ба ҳамкории иқтисодӣ

   Душанбе, 30.06.2015. (АМИТ «Ховар»,  Азизаи Саид ). — Имрӯз  дар Китобхонаи миллии Тоҷикистон ҷаласаи дуюми Комиссияи байниҳукуматии Тоҷикистону Молдова оид ба ҳамкории иқтисодӣ баргузор гардид.   Ҷаласаро аз номи Ҳукумати Ҷумҳурии Тоҷикистон раиси Кумитаи давлатии сармоягузорӣ ва идораи амволи  давлатии Ҷумҳурии Тоҷикистон Қодири Қосим  ва   муовини  вазири  иқтисоди Молдова  Тудор Капоч роҳбарӣ намуд.
   Дар ҷаласа масъалаи тақвият бахшидани ҳамкориҳо дар соҳаи тиҷорат ва иқтисод, сармоягузорӣ ва дастгирии соҳибкории хурду миёна, кишоварзӣ, саноат, энергетика, тандурустӣ, нақлиёт, ҳифзи муҳити зист, сохтмон ва меъморӣ, маориф ва илм, фарҳанг, сиёсати ҷавонон, варзиш ва туризм ва дигар соҳаҳои  дорои манфиати мутоқобила мавриди баррасии ҷонибҳо қарор гирифт.
      Тибқи маълумоти оморӣ гардиши савдои Ҷумҳурии Тоҷикистон бо  Молдова 3.9 млн. доллари ИМА-ро ташкил додааст, ки аз он 1.3 млн. доллари ИМА-ро содирот ва 2.6 млн. доллари ИМА-ро воридот ташкил додааст.
      Бо мақсади афзоиш додани гардиши савдои дуҷониба тарафҳо ба мувофиқа расиданд, ки лоиҳаи Барномаи ҳамкории иқтисодӣ байни Ҷумҳурии Тоҷикистон ва Ҷумҳурии  Молдоваро таҳия ва имзо намуда, тамоми имкониятҳои мавҷударо баҳри таҳкими ҳамкории иқтисодии ду кишвар истифода намоянд.
    Ёдовар мешавем, ки ҷаласаи якуми комиссияи мазкур дар соли 2004 дар шаҳри Кишинев баргузор гардида буд.
     Дар ҷаласа Протоколи ҷаласаи дуюми  Комиссияи байниҳукуматии Тоҷикистону  Молдова оид ба ҳамкории иқтисодӣ ба имзо расид.