170 корхонаи саноатӣ бо 5,3 ҳазор ҷойи нави корӣ ба истифода дода мешавад

Хуҷчанд, 16.072015. (АМИТ «Ховар»).-Ҳаҷми истеҳсоли маҳсулоти саноатӣ дар вилояти Суғд ба 2,1 млрд. сомонӣ расонида шуд, ки нисбат ба ҳамин давраи соли қаблӣ 451,9 млн. сомонӣ зиёд аст. Тавре ки аз хадамоти матбуотии раиси вилояти Суғд иттилоъ доданд, агар дар ҳамин давраи соли гузашта суръати рушди саноат дар вилоят бо нархҳои амалкунанда ба 123,2 фоиз баробар шуда бошад, он гоҳ нишондиҳандаи мазкур дар нимсолаи аввали соли 2015 бо нархҳои амалкунанда ба 128,2 фоиз баробар гардид.
Дар натиҷаи тадбирҳои андешидашуда дар давоми нимсолаи якум дар миқёси вилоят 76 корхонаву коргоҳи нав бо 1054 ҷойи нави корӣ ба фаъолият шурӯъ намуд. Корхонаҳои таъсисшуда асосан корхонаҳои соҳаи саноати масолеҳи сохтмон, хӯрокворӣ ва сабукро дар бар гирифта, барои таъмини бозори дохилӣ бо маҳсулоти истеҳсоли ватанӣ ва воридотивазкунанда мусоидат намуданд.
Тибқи нақша дар соли 2015 ба истифода додани 170  корхонаву коргоҳи нави саноатӣ бо 5,3 ҳазор ҷойи нави корӣ дар назар дошта шудааст.