28 ҳолати ҳуқуқвайронкунии маъмурӣ ошкор гардид

     Душанбе, 30.07.2015. (АМИТ «Ховар», Лайло Тоирӣ).- Дар  давоми моҳҳои январ-июли соли 2015 гурӯҳҳои кории Раёсати Хадамоти муҳоҷирати Вазорати меҳнат, муҳоҷират ва шуғли аҳолии Ҷумҳурии Тоҷикистон дар 15 ширкати бо ҷалби қувваи кории хориҷӣ фаъолиятбаранда санҷиши назоратӣ гузаронида, 28 ҳолати ҳуқуқвайронкунии маъмуриро ошкор намуданд.  Ҳамзамон дар ин давра марҳилаи якуми амалиёти «Нелегал-2015» доир гардид, ки дар ҷараёни он 21 ҳолати ҳуқуқвайронкунии маъмурӣ ошкор шуд. Дар маҷмӯъ ҳангоми гузаронидани санҷишҳо дар ширкатҳо ва корхонаҳои муштарак дар доираи марҳилаи якуми амалиёти Нелегал-2015 64 ҳолати ҳуқуқвайронкунии маъмурӣ ошкор гардид.
Тавре ки сухангӯи Хадамоти муҳоҷират А. Қодирӣ иттилоъ дод, сармутахассисони дастгоҳи раёсати Хадамоти муҳоҷират дар шаҳри Чкалов 17 адад, ноҳияи Ҷаббор Расулов 8 адад, ноҳияи Б.Ғафуров 3 адад ва дар «Фурудгоҳи байналмилалии Хуҷанд» 5 ҳолати ҳуқуқвайронкунии маъмуриро ошкор намуданд.