А.Қодирӣ: Дар хориҷи кишвар 86 ташкилоти ҷамъиятӣ расман фаъолият дорад

Душанбе, 09.07.2015. (АМИТ «Ховар», Лайло Тоирӣ).- Дар  айни замон 82 ташкилоти ҷамъиятӣ, марказҳои фарҳангӣ ва диаспораҳои тоҷикон дар қаламрави Федератсияи Русия,  2 ташкилоти ҷамъиятӣ дар Ҷумҳурии Украина ва 2 ташкилоти ҷамъиятӣ дар Ҷумҳурии Қазоқистон ба таври расмӣ фаъолият доранд. 
Бино ба гуфтаи сухангӯи Хадамоти муҳоҷират Абдулоҳи Қодирӣ, ҷиҳати ба роҳ мондани ҳамкории доимӣ ва хабардор будан аз фаъолияти диаспораҳо, дар сомонаи хадамот рӯйхати ташкилотҳои ҷамъиятӣ бо забони тоҷикӣ ва русӣ бо назардошти суроға, ҳайати роҳбарии он, телефонҳо ва дигар маълумоти зарурӣ  интишор шудааст.  
То  кунун сардори Хадамоти муҳоҷират Тоҳир Каримзода бо раисони ҷамъиятҳои миллӣ-фарҳангии тоҷикон:  «Ҳамватан» — и вилояти Иркутск Муриват Маликшоев, ҷамъияти ба номи «Рӯдакӣ»-и Ҷумҳурии Фаронса Масъуди Миршоҳӣ, роҳбари Ассотсиатсияи халқҳои Урал Фаррух Мирзоев ва директори генералии Маркази бисёрсамтаи муҳоҷирати меҳнатӣ дар шаҳри Екатеринбург Анатолий Зирянов мулоқот намудааст.
«Дар айни замон дар Хадамоти муҳоҷират хазинаи иттилоотӣ дар бораи диаспораҳои тоҷикон ва ҳамватанони бурунмарзӣ вуҷуд дорад  ва он барои таъмини ҳамкории босамар ва ташаккули сиёсати давлатӣ дар робита бо диаспораҳо, ҳамватанон ва тоҷикони бурунмарзӣ заминаи хуб мегузорад»,-илова намуд Абдуллоҳи Қодирӣ.