Агентии беҳдошти замин: ҳолати 3 ҳазор гектар замин беҳтар карда шуд

     Душанбе, 20.07.15.(АМИТ «Ховар» Маҳинаи Собир).-Имрӯз дар Агентии беҳдошти замин ва обёрии назди Ҳукумати Ҷумҳурии Тоҷикистон бо иштироки хабарнигорон нишасти матбуотӣ баргузор гардид. Зимни  нишасти хабарӣ муовини директори агентӣ Абдулло Қурбонов  зикр намуд, ки дар соли  2015  беҳтар  гардонидани  ҳолати мелиоративии  8 ҳазор гектар  замин бо маблағгузории  8,86 млн. сомонӣ  ба нақша гирифта шудааст, ки иҷрои он ба ҳолати  1 июли соли равон 3 ҳазор гектар бо маблағи  2, 78 млн. сомониро ташкил менамояд.
       Тавре ки зикр гардид,  барои  дастгирии  соҳа  дар назди агентӣ  марказҳои татбиқи  лоиҳаҳои инвеститсионии «Обёрии заминҳои водии Данғара дар масоҳати 1750 га (марҳилаи 2), Обёрии заминҳои  водии Данғара  дар масоҳати 1750 га (марҳилаи 3)», «Таъминоти шуғли аҳолӣ барои устувории  хоҷагии қишлоқ ва захираҳои обӣ ( марҳилаи 2)» ва «Таъмини  устувории ҳавзаи дарёи Панҷ ба тағйирёбии иқлим» бо маблағи умумии 770,6 млн. сомонӣ (132,865 млн. доллари ИМА) фаъолият доранд.