Ҳалокати се нафар бар асари садама

Душанбе, 10.07.2015. (АМИТ «Ховар», Лайло Тоирӣ).- Дар натиҷаи садамаҳое, ки рӯзи 8 июл рух доданд, се нафар ба ҳалокат расид. 
Тавре ки аз хадамоти матбуоти ВКД хабар доданд, ронандаи мошини  “Nexia”, сокини 24-солаи ноҳияи Ҷиликӯл ҳангоми ҳаракат аз шаҳри Қурғонтеппа ба самти ноҳияи Ҷиликӯл дар ҳудуди деҳаи К.Маркси ноҳияи мазкур аз уҳдаи идораи воситаи нақлиёт набаромада, велосипедрон, сокини 31-солаи ҳамин деҳаро пахш намудааст. Дар натиҷа, велосипедрон ҷароҳати вазнини ҷисмонӣ бардошта, дар ҷойи ҳодиса ба ҳалокат расидааст.
Инчунин ронандаи мошини “Opel-astra”, сокини 34-солаи ноҳияи Фархор, ҳангоми ҳаракат аз маркази ноҳияи Фархор ба ҷамоати деҳоти 20-солагии Истиқлолияти Тоҷикистони ҳамин ноҳия, бехатарии ҳаракат дар роҳро таъмин карда натавониста, пиёдагарди ноболиғ, писарчаи 10-солаи сокини ҷамоати деҳоти мазкурро  пахш намудааст. Дар натиҷа, ноболиғ ҷароҳати вазнини ҷисмонӣ бардошта, дар беморхона фавтидааст.  
Ронандаи мошини “Opel-astra”, сокини 34-солаи шаҳри Хуҷанд, ҳангоми ҳаракат бо роҳи нақлиётгарди Ғафуров-Булок-Понғоз дар ҳудуди ҷамоати деҳоти Исмоили ноҳияи Б.Ғафуров аз уҳдаи идораи воситаи нақлиёт набаромада, ба тарафи рости роҳ чаппа шудааст. Дар натиҷа ронанда ҷароҳати вазнини ҷисмонӣ бардошта, дар ҷойи ҳодиса ба ҳалокат расидааст.