Боркашонӣ аз тариқи ҳама гуна намудҳои нақлиёт 1,8 % афзуд

Душанбе, 30.07.2015. (АМИТ «Ховар», Фарзонаи Давлат).-Суҳроб Мирзоев, муовини якуми вазири нақлиёти Тоҷикистон имрӯз, 30  июл дар ҷамъбасти шашмоҳаи вазорат гуфт, дар нимсолаи аввали соли 2015-ум тавассути ҳамаи намудҳои нақлиёт 36,9 млн. тонна бор кашонида шудааст, ки нисбат ба ҳамин давраи соли 2014-ум 1,8 фоиз зиёд аст.
Ба гуфтаи Мирзоев, аз ҳаҷми умумии боркашонӣ 34,0 млн. тонна бор (92,2%) ба нақлиёти автомобилӣ ва 2,9 млн. тонна бор (7,8%) ба нақлиёти роҳи оҳан рост меояд, ки нисбат ба ҳамин давраи соли гузашта нақлиёти автомобилӣ 3,1 фоиз зиёд ва нақлиёти роҳи оҳан 11,3 фоиз коҳиш ёфтааст. 
Дар ин давра бо ҳамаи намудҳои нақлиёт ба 270,8 млн. мусофир хизмат расонида шудааст, ки нисбат ба ҳамин давраи соли 2014-ум 2,3 фоиз зиёд мебошад,-иброз дошт ӯ ба хабарнигорон.