Э. Раҳмон: Бо дарназардошти ҳамсоягии наздик робитаҳои тиҷоратию иқтисодии Тоҷикистон ва Ҳиндустон бояд ҷавобгӯи иқтидори ҳамкорӣ бошанд

Душанбе, 13.07.2015. (АМИТ Ховар). — Бо дарназардошти ҳамсоягии наздики кишварҳои мо, дар дурнамои наздик робитаҳои тиҷоратию иқтисодӣ миёни Тоҷикистон ва Ҳиндустон бояд ҷавобгӯи иқтидори ҳамкориҳои мо бошанд», — ин нуктаро Президенти Ҷумҳурии Тоҷикистон Эмомалӣ Раҳмон 13 июл зимни суханронӣ дар Форуми кишоварзии Тоҷикистону Ҳиндустон иброз дошт.
Сарвари давлат афзуд, ки аз ин лиҳоз, ба ҳамраисони Комиссияи муштараки Тоҷикистону Ҳиндустон оид ба ҳамкориҳои тиҷоратӣ, иқтисодӣ ва илмию техникӣ дастур дода шуд, ки дар ҷаласаи навбатии худ, ки  дар соли ҷорӣ дар шаҳри Душанбе бояд баргузор гардад, стратегияи рушди муносибатҳои тиҷоратӣ ва сармоягузориро таҳия намоянд ва ҷиҳати мусоидат ба ҳамкории доираҳои соҳибкорӣ кадамҳои мушаххасро муайян созанд.   
«Пӯшида нест, ки Ҳиндустон дар бахши кишоварзӣ, аз ҷумла пажуҳиш, рушд ва коркарди маҳсулоти кишоварзӣ ва таъмини амнияти озуқаворӣ пешравиҳои қобили таваҷҷуҳ дорад. Таҷрибаи ин кишвар шоистаи омӯзиш аст ва бисёре аз кишварҳои ҷаҳон аз сиёсати кишоварзии Ҳиндустон пайравӣ мекунанд. Аз ин лиҳоз, мо аз ҳама гуна иқдомҳои судманду муштарак ҷиҳати рушди ҳамкориҳо бо Ҳиндустон дар соҳаи кишоварзӣ, ба хусус ҷалби бештари ширкатҳои Ҳиндустон ба соҳаи коркарди маҳсулоти кишоварзӣ, ворид намудани фанновариҳои нав ва усулҳои пешрафтаи тадқиқотӣ дар ин соҳаи ҳаётан муҳимми иқтисодиёти миллӣ истиқбол мекунем, — тазаккур дод Президенти кишвар Эмомалӣ Раҳмон.