Экскаваторҳо барои кишоварзони Суғд

Душанбе, 30.07.15. (АМИТ «Ховар», Марҳабои  Азамат). — Дар  ҳошияи  лоиҳаи «Мусоидат  ба ислоҳоти бахши об дар  Тоҷикистон дар  асоси  принсипҳои ИУВР» 7 адад  экскаватор  дастраси  кишоварзони  вилояти  Суғд  гардид. Лоиҳаи  мазкурро Раёсати  рушду  ҳамкории  Швейтсария  якҷоя  бо Барномаи рушди  СММ маблағгузорӣ  менамояд. 
Экскаваторҳо байни раёсатҳои  мелиоратсия ва обёрӣ, Федератсияи  истифодаи  оби ноҳияи  Конибодом, Ассотсиатсияҳои истифодабарандагони «Чоркӯҳ»,  «Матпарӣ», «Меҳнатобод — Ворух» ва  «Ғузлон» тақсим  карда шуд. 
Техникаи  зикршуда  барои  тоза кардани каналҳои обёрикунанда  истифода  мешавад.  Имрӯз теъдоди  зиёди  истифодабарандагони  об  дар  деҳоти  Тоҷикистон аз кам  шудани оби  дарёҳо  шикоят  мекунанд. Бинобар  ин  экскаваторҳо, чун  мошину  механизмҳои  дигар,  воситаҳои  муҳиме  барои коҳиш  додани норасоии  об  бо  усули   беҳдошти  истифодаи  каналу  заҳбурҳо маҳсуб  меёбанд.