Эмомалӣ Раҳмон: «Тагор ошиқи Машриқзамин ва пайвандгари маънавии Тоҷикистону Ҳиндустон аст»

Душанбе, 13.07.2015. (АМИТ «Ховар»). — Имрӯз дар пойтахти Тоҷикистон-шаҳри Душанбе муҷассамаи шоир, файласуф, мусиқидон ва чеҳрапардози чирадасти ҳиндӣ Робиндранат Тагор бо иштироки Президенти Ҷумҳурии Тоҷикистон Эмомалӣ Раҳмон ва Сарвазири Ҷумҳурии Ҳиндустон Нарендра Модӣ расман ифтитоҳ ёфт. 
Дар ин маросим Сарвари давлати Тоҷикистон Эмомалӣ Раҳмон Робиндранат Тагорро аз зумраи он бузургоне номид, ки беш аз мардумони замони хеш ба наслҳои оянда тааллуқ доранд. 
«Тагор ошиқи Машриқзамин буд ва ишқу алоқаи бештаре ба сарзамини шоирхези форсизабонон  ва забони форсӣ дошт. Ў ду маротиба барои зиёрати оромгоҳҳои классикҳои адабиёти тоҷику форс Ҳофиз ва Фирдавсӣ азм намудааст ва ҳангоми ин сафарҳояш ҳатто худро эронӣ хондааст. Ва басо рамзист, ки ин Аллома дар оғози асри XXI пайвандгари маънавии ду кишвари дўст – Тоҷикистону Ҳиндустон мебошад», — тазаккур дод Эмомалӣ Раҳмон.
Маврд ба зикр аст, ки Тагор дар ин ҷаҳони нав бо дардҳо, ранҷҳо, беадолатиҳову бемориҳо ошно шуд, ҳамзамон сарвати маънавии миллати бузурги Ҳиндро шинохт ва ба тасвири чеҳраи воқеии он пардохт. Ў пас аз ин беҳтарин осори худро ба вуҷуд овард, достонҳои ҳаяҷонангезе нигошт ва намоишномаҳои камназирро ба риштаи таҳрир кашид.